平玩Tricker's首選！鞋牌新貴Pedestrian Vata Oxford Low

近年潮流界改朝換代，紳士風、大人風等一一崛起，潮人亦開始轉玩本物、玩成熟。昔日笠記爛牛，再襯不死波鞋，即時此情不再。取而代之的便是由恤衫、chino掛帥的斯文造型。連帶一眾原屬「爸爸級」的經典皮鞋品牌，如Tricker's、Grenson、Loake等等亦即時「升呢」。

不過縱觀街上潮人，雖然個個恤衫chino斯文上身，但下身竟然潮襯「關刀」牌，唉，觀音頭掃把腳是也！雖然筆者都知，一對靚皮鞋「閒閒地」二三千元入場費(純粹起點！更甚者如Junya Watanabe x Tricker's，盛惠九千大元！)，的確令人汗顏卻步。

不過幸好近日，本地土炮潮舖─LUX，引入了新晉鞋牌Pedestrian，大玩近期大熱的wing-tips Oxford shoes，鞋形靚之餘亦用上無咁「老積」的白底Rubber Sole，出齊黑杏兩色，即時潮哂！而且價錢亦屬同類鞋款的平價之選，兩個字，抵玩！